મણિપુરમાં કાયમી શાંતિની માગ કરી રહેલા હજારો લોકોની શનિવારે પોલીસ સાથે અથડામણ થઈ હતી. આ બધા CM આવાસ તરફ કૂચ કરવા નીકળ્યા હતા પરંતુ પોલીસે તેમને રોક્યા હતા. પ્રદર્શનકારીઓએ પોલીસ દ્વારા લગાવવામાં આવેલા બેરિકેડ્સ તોડવાનો પ્રયાસ કર્યો હતો. સુરક્ષા દળોએ પ્રદર્શનકારીઓને વિખેરવા માટે આંસુ ગેસના અનેક ગોળા છોડ્યા હતા. પ્રદર્શનકારીઓએ સૂત્રોચ્ચાર કર્યા. બિષ્ણુપુર જિલ્લામાં તાજેતરમાં થયેલા બોમ્બ વિસ્ફોટમાં માર્યા ગયેલા બે બાળકો માટે ન્યાય અને વંશીય સંઘર્ષથી પ્રભાવિત આંતરિક રીતે વિસ્થાપિત લોકોના પુનર્વસનની માગ કરી. બાદમાં પ્રદર્શનકારીઓના એક જૂથને CM વાય. ખેમચંદ સિંહને મળવાની મંજૂરી આપવામાં આવી. તેમણે આ મામલે એક મેમોરેન્ડમ સુપરત કર્યું. 5 તસવીરોમાં જુઓ ઘટના:
રેલીઓને રોકવામાં આવી, CMના ઘરની સુરક્ષા વધારવામાં આવી પ્રદર્શનકારીઓએ, મેઇતેઇ સંગઠન COCOMI (કોઓર્ડિનેટિંગ કમિટી ઓન મણિપુર ઇન્ટિગ્રિટી)ના બેનર હેઠળ ચાર અલગ-અલગ રેલીઓ કાઢી હતી, જેને અલગ-અલગ જગ્યાએ રોકવામાં આવી હતી. તેઓ બાબુપાડા વિસ્તારમાં CMના બંગલા તરફ આગળ વધી રહ્યા હતા. અધિકારીઓએ જણાવ્યું કે CMના આવાસ તરફ જતી ચારેય દિશાઓમાં વધારાના સુરક્ષા દળો તૈનાત કરવામાં આવ્યા અને બેરિકેડ લગાવવામાં આવ્યા. ઇમ્ફાલ પૂર્વ જિલ્લામાં ખુરાઈ લામલોંગમાં CMના બંગલાથી લગભગ 2 કિલોમીટર દૂર પ્રદર્શનકારીઓએ પોલીસ બેરિકેડ તોડવાનો પ્રયાસ કર્યો. આંદોલન વધુ તેજ કરીશું COCOMIના સંયોજક વાય. કે. ધીરેને CM સાથે મુલાકાત કર્યા બાદ પત્રકારોને જણાવ્યું કે સંગઠન, જનતા સાથે મળીને, લોકોની માંગણીઓ મનાવવા માટે આંદોલનને વધુ તેજ કરશે. તેમણે કહ્યું કે 3 મે, 2023થી મણિપુર સંકટમાં કોઈ નક્કર સમાધાન નીકળી શક્યું નથી; તેમણે આરોપ લગાવ્યો કે નિર્ણાયક રાજકીય ઇચ્છાશક્તિનો અભાવ છે અને પરસ્પર વિરોધાભાસી નિવેદનોએ શાંતિ પ્રયાસોમાં અવરોધ ઊભો કર્યો છે. COCOMIના પ્રવક્તા નાહકપમ શાંતા સિંહે આ પહેલા કહ્યું હતું કે સંગઠન મણિપુર સરકાર પાસેથી 7 એપ્રિલે ત્રોંગલાઓબીમાં થયેલા બોમ્બ વિસ્ફોટમાં બે બાળકોના મોત પર ‘એક્શન ટેકન રિપોર્ટ’ની માગ કરે છે. તેમણે કહ્યું, “આ સાથે જ, અમે અન્ય ઘણી માંગણીઓ પણ ઉઠાવી છે. જો સરકાર જવાબ આપવામાં નિષ્ફળ રહેશે, તો અમે આંદોલનની અન્ય લોકતાંત્રિક રીતો અપનાવવા મજબૂર થઈશું.” 3 મે, 2023 થી મણિપુરમાં ઇમ્ફાલના મૈતેઈ અને આસપાસની ટેકરીઓના કુકી સમુદાયો વચ્ચે થયેલી વંશીય હિંસામાં 260 થી વધુ લોકો માર્યા ગયા છે અને હજારો લોકો બેઘર બન્યા છે. COCOMI શું છે? કોઓર્ડિનેટિંગ કમિટી ઓન મણિપુર ઇન્ટિગ્રિટી (COCOMI) મણિપુરના મૈતેઈ સમુદાયનું એક મુખ્ય સિવિલ સોસાયટી સંગઠન છે, જે રાજ્યની પ્રાદેશિક અખંડિતતા અને સમુદાયના હિતોના રક્ષણ માટે કામ કરે છે.
COCOMI ની રચના મણિપુરમાં વધતા વંશીય તણાવ વચ્ચે અલગ-અલગ મૈતેઈ સંગઠનોને એક મંચ પર લાવવા માટે કરવામાં આવી. તેનો મુખ્ય ઉદ્દેશ્ય છે મણિપુરની ભૌગોલિક એકતા જાળવી રાખવી, બાહ્ય દબાણોનો વિરોધ કરવો અને મૈતેઈ સમુદાયની સુરક્ષા સુનિશ્ચિત કરવી. મણિપુર સંકટમાં COCOMI માત્ર એક સંગઠન નથી, પરંતુ મૈતેઈ સમુદાયનો સામૂહિક અવાજ બની ચૂક્યો છે. તેના વલણ અને નિર્ણયો રાજ્યની રાજનીતિ અને શાંતિ પ્રક્રિયા બંનેને સીધી અસર કરે છે. મણિપુરમાં એક વર્ષ રાષ્ટ્રપતિ શાસન રહ્યું, 4 ફેબ્રુઆરીએ નવી સરકાર બની મણિપુરમાં મે 2023માં મૈતેઈ અને કુકી સમુદાયો વચ્ચે વંશીય હિંસા શરૂ થઈ હતી. આ 2025ના શરૂઆતના મહિનાઓ સુધી ચાલુ રહી. હિંસા દરમિયાન ઘણા વિસ્તારોમાં આગચંપી, લૂંટ અને હત્યાની ઘટનાઓ બની. હજારો લોકો વિસ્થાપિત થયા અને રાહત શિબિરોમાં રહેવા મજબૂર થયા. મણિપુરના તત્કાલીન મુખ્યમંત્રી એન. બિરેન સિંહે 9 ફેબ્રુઆરી, 2025ના રોજ રાજીનામું આપી દીધું હતું. બે વર્ષથી વધુ સમય સુધી ચાલેલી હિંસા રોકવામાં નિષ્ફળ રહેવાને કારણે તેમના પર સતત રાજકીય દબાણ વધી રહ્યું હતું. બીરેન સિંહના રાજીનામા પછી 13 ફેબ્રુઆરી 2025ના રોજ મણિપુરમાં રાષ્ટ્રપતિ શાસન લાગુ પડ્યું હતું. લગભગ એક વર્ષ પછી 4 ફેબ્રુઆરી 2026ના રોજ મણિપુરમાં નવી સરકારની રચના થઈ. ભાજપના યુમનમ ખેમચંદ સિંહે મુખ્યમંત્રી તરીકે શપથ લીધા.
મણિપુરમાં પ્રદર્શનકારીઓની પોલીસ સાથે અથડામણ:સુરક્ષા દળોએ રોકવા માટે ટીયર ગેસ છોડ્યા, મુખ્યમંત્રીના ઘર તરફ કૂચ કરી રહ્યા હતા
